"Иракийн эрх чөлөө" олон улсын цэргийн хамтарсан ажиллагаа бол Монгол Улсын Зэвсэгт хүчнийг НҮБ-ын энхийг сахиулах ажиллагаанд оролцож, дэлхийн цэргийн дансанд багтаж, алдраа дуурьсгах үүд хаалгыг нээж өгсөн түүхэн ажиллагаа билээ. 
Тус ажиллагаанд оролцсон Монгол Улсын Зэвсэгт хүчний хоёрдугаар ээлжийн цэргийн багийн 7 хоног тутмын "ЦЭРЭГ СОНИН" бол 1939, 1945 оны дайны фронт дээр гарч байсан "Эх орны төлөө" хэмээх хээрийн сониноос хойш дэлхийн халуун цэг дээр фронтын нөхцөлд гарсан анхны сонин юм. 
Энэхүү сониныг тус цэргийн багийн хэвлэл олон нийттэй харилцах офицер, цэргийн сэтгүүлчээр үүрэг гүйцэтгэсэн Зэвсэгт хүчний хяналт-шинжилгээ, үнэлгээний газрын гал түймрийн хяналтын улсын ахлах байцаагч дэд хурандаа С.Зоригтбаатар эрхлэн гаргаж байжээ. Тэрээр тухай үед Зэвсэгт хүчний "Соёмбо сонин"-ны сурвалжлагчаар ажиллаж байсан юм.