Аравдугаар сарын 5-нд УИХ дахь Ардчилсан намын бүлгийн даргыг сонгох асуудал хойшилсны дараа бүлгийн тамгыг Ц.Баатархүү, Д.Цогтбаатар нар авч явсан гэх мэдээлэл хэвлэлээр гарсан. Улмаар бүлгийн даргын сонголт дахин хэлэлцэх асуудал болж, Х.Тэмүүжин, Б.Түвшин нарын нэрс яригдаж буй. Өнгөрсөн тавдугаар сард ч энэ хоёрын нэр бүлгийн дарга болохоор өрсөлдөж байсныг санавал АН-ын удирдлагын маргаан нэг удаагийн асуудал биш гэдгийг харуулна. Одоо бол намын тамга хэн дээр байгаа тухай маргаанаас илүүтэй, АН-ын бүлгийг хэн удирдах, бүлгийн шийдвэр гаргах эрх мэдэл хэнд төвлөрөх, дотоод өрсөлдөөнийг ямар зарчмаар шийдвэрлэх вэ гэдэг нь улс төрийн гол асуудал болоод байна. АН-ын дотоод өрсөлдөөнийг хэт дэвэргэж, сөрөг хүчнийг өөрсдөө ч нэгдэж чаддаггүй, удирдлагаа ч шийдэж чаддаггүй мэтээр олон нийтэд ойлгуулах нь эрх баригчдад ашигтай дүр зураг үүсгэж болох юм. Өөрөөр хэлбэл, АН-ын дотоод асуудал намын хүрээнээс хальж, сөрөг хүчний улс төрийн имижтэй холбоотой сэдэв болж байна. АН-ын тамга, бүлгийн дарга тойрсон маргаан хэрхэн өрнөж, ямар мэдээлэл олон нийтэд хүрч, үүний улмаас хэн улс төрийн ашиг хүртэж болох вэ гэдгийг тус тусад нь авч үзэх шаардлагатай байх. АН-ын хувьд хамгийн том сорилт нь хэн бүлгийн дарга болохоос гадна тэр сонголтыг хэрхэн хийхэд оршино. Өрсөлдөөн байж болно. Харин өрсөлдөөн дүрэм, ил тод байдал, хамтын шийдвэрийн хүрээнд явагдах ёстой. Эс бөгөөс дотоод асуудлаа шийдвэрлэх гэж буй үйл явц нь өөрөө намын нэр хүндэд сөргөөр нөлөөлөх эрсдэлтэй. Ер нь тэгээд сөрөг хүчний жин нэгдмэл харагдахдаа бус, дотоод зөрчлөө институцийн хүрээнд шийдвэрлэж, бодлогын байр сууриа хадгалж чадахад оршино.