Дуучин A cool урлагийн академи нээнэ
Өнгөрсөн хавар өөрийнхөө төрсөн өдрөөр бие даасан гурав дахь тоглолтоо сүр дуулиантайгаар хийсэн дуучин A cool сургууль байгуулж байгаа аж. Энэ талаар дуучин A cool буюу Б.Анхбаяраас тодрууллаа.
-Юуны өмнө Монголын урлагийн академи байгуулах гэж байгаад баяр хүргье. Академийн нээлт хэзээ болох вэ?
-Баярлалаа. Танай сайтын нийт уншигчдад энэ өдрийн мэнд хүргье. Тиймээ би Монголын урлагийн академи гэж шинэ сургууль байгуулж байгаа. Академийн нээлт ирэх наймдугаар сарын 10-нд болно.
-Залууст урлагийн ямар боловсролыг олгох вэ?
-Хип хоп реппер болох хүсэлтэй залууст уг урсгалын талаарх мэдээлэл боловсролыг олгоно. Мөн ардын язгуур урлаг болох хөөмий, морин хуур, чөлөөт бүжиг, мake up artist буюу нүүр будагч, хөтлөгч сэтгүүлч, жүжигчин зэрэг ангидаа элсэлт авч байна. Сургалтууд маань бүгд практик дээр явагдана. Манай академийн зүгээс видео дуу бичлэгийн студи, бүжгийн заал бусад тоног төхөөрөмжийг бэлтгэж байна. Зарим тоног төхөөрөмжүүд маань гаднаас ирж байгаа. Ерөнхийдөө бэлтгэл ажил хангагдаж байна.
-Ямар багш нар хичээл заах вэ. Гадаадаас мэргэжлийн багш нар урьж авчирч байгаа гэж сонссон.
-Тиймээ. Америк, Их британ, Хятад, Япон, Солонгосоос мэргэжлийн багш нар ирж ажиллана. Мөн мэргэжлийн залуу үеийн төлөөлөл, олны танил хүмүүс хичээл заах болно. Манай академийн зөвлөх багшаар монголын урлаг соёлын салбарт нэрээ мандуулсан, алтан үеийн мастерууд ажиллахаар болсон гэдгийг албан ёсоор мэдэгдье” гэв.
Б.Дэжид
