Энэ сарын 8-ны өдөр БЗД-ийн нутаг дэвсгэр, Улиастай орчимд баавгай айлын гэр рүү дайрсны улмаас 40 настай эрэгтэй амиа алдаж, 55 настай эмэгтэй хүнд гэмтэж эмнэлэгт хүргэгдсэн.Тэгвэл баавгайн халдлагад өртсөн иргэн хүнд байдалтай эмчлүүлсээр байна. Харин түүний ар гэрийнхэн өнөөдөр олон нийтээс тусламж хүсэж хэвлэлийн хурал зарласан.

Хүний амь нас, эрүүл мэндтэй холбоотой ийм хүнд нөхцөлд ар гэрийнхэн нь иргэдээс хандив тусламж хүсэхээс өөр аргагүйд хүрч байгаа нь төрийн байгууллагуудын оролцоо, хариуцлагын асуудлыг хөндөж байна

Харин эндээс хүний амь нас, эрүүл мэндэд ноцтой эрсдэл учирсан ийм нөхцөлд тухайн иргэн болон түүний гэр бүл эмчилгээ, асаргаа сувилгааны асуудлаа дангаараа үүрэх ёстой юу гэсэн асуулт гарч ирж байна.

Энэхүү асуудалд төрийн байгууллагуудын оролцоо хаана байна вэ?

Зэрлэг амьтны халдлагад өртөж, хүнд гэмтэл авсан иргэнд эмнэлгийн тусламж үйлчилгээ үзүүлэхээс гадна цаашдын эмчилгээ, нөхөн сэргээх тусламж, нийгмийн хамгааллын боломжийг судлах шаардлагатай. Гэвч ар гэрийнхэн нь олон нийтээс хандив хүсэж байгаа энэ үед холбогдох яам, төрийн байгууллагууд ямар дэмжлэг үзүүлсэн, цаашид ямар арга хэмжээ авахаа тодорхой байлгах учиртай.

Хэрэв төрийн байгууллагуудаас шаардлагатай дэмжлэг үзүүлээгүй бол үүний шалтгаан юу вэ? Тухайн иргэн төрийн ямар тусламж, үйлчилгээ авах боломжтой вэ? Эмчилгээний зардал болон нөхөн сэргээх тусламжийг шийдвэрлэхэд ямар байгууллага хариуцлага хүлээх вэ?

Эдгээр асуултад холбогдох байгууллагууд тодорхой хариулт өгөх шаардлагатай байна.

Тусламж хүссэн ар гэрийнхэн ганцаараа үлдэх ёсгүй

Иргэдийн хандив, сайн дурын тусламж нь хүнд нөхцөлд байгаа хүмүүст бодит дэмжлэг болдог. Гэвч хүний амь нас, эрүүл мэндтэй холбоотой асуудлыг зөвхөн олон нийтийн сайхан сэтгэлд даатгаж болохгүй.

Төрийн байгууллагууд тухайн иргэний нөхцөл байдлыг судалж, хуульд заасан тусламж, үйлчилгээ авах боломжийг нь тодорхойлж, шаардлагатай дэмжлэг үзүүлэх эсэхээ олон нийтэд мэдээлэх нь зүйтэй.

Баавгайн халдлагад өртсөн иргэний биеийн байдал, эмчилгээний явц, ар гэрт нь шаардлагатай тусламжийн талаар бодит мэдээлэл хүргэхийн зэрэгцээ төрийн байгууллагуудын авч хэрэгжүүлж буй арга хэмжээ, цаашдын төлөвлөгөөг тодруулж олон нийтэд мэдээллэх хэрэгтэй.

Энэ бол зөвхөн нэг гэр бүлийн асуудал биш. Хүнд нөхцөлд орсон иргэнд төрийн үйлчилгээ хэрхэн хүрч байгаа, тусламж шаардлагатай үед хариуцсан байгууллагууд ямар үүрэг хүлээж байгаа тухай нийгмийн анхаарал татсан асуудал юм.

Тухайн иргэнд хандив тусламж хэрэгтэй байгаа нь ойлгомжтой. Харин үүнтэй зэрэгцэн холбогдох төрийн байгууллагууд бодит нөхцөл байдлыг үнэлж, ямар дэмжлэг үзүүлэх боломжтойгоо тодорхой тайлбарлан, хариуцлагатай ажиллах шаардлагатай байна.